星期四, 12月 07, 2006

我 d Blog 好深咩?

已經唔止一個人話我個 blog 寫得好深。

第一個係團友「娛樂」---呢個都係意料中事,因為佢對我個 Blog 裡面寫左好多關於同人誌同埋漫畫世界o既野認識唔多,睇唔明都無計;問佢o甘關於教會o既 Blog 又睇唔睇得明,佢又話睇得明,o甘無咩問題呀應該?

第二,三個係我o個兩個妹「X」同「XX」,佢地話我 d 野深不特止,仲一 d 都唔口語化,搞到個 Blog 好似好凝重o甘。我都知道我寫 d 野係難明 d,但原因竟然因為唔係口語?天呀!一直以來只會有話人寫文章用口語唔好,到而家竟然倒番轉頭,用書面語會俾人話,真係世界變啦!

不過,諗番起,俾人話我「文質彬彬」亦都唔止一次啦,之前都o係因為我o係 ICQ 或者 MSN o個陣都係用書面語o既緣故,由於o係網上,我亦判斷唔到佢地係讚緊我定係彈緊我,又或者只係覺得我奇怪...

好,好,o甘好玩,就聽你地一次,呢劑用口語寫。

上星期開始我同兩個妹都互睇對方o既 Blog,佢地睇完就話我 d 野深,我就從「XX」同佢班主任o既 Blog 睇到一 d 佢o係學校o既經歷,其中最得意o既係,佢竟然有份負責學校每年都有o既扯大纜比賽,仲有相睇 tim。以佢輕到風都吹得走o既身型,真係......佢個班主任為左同佢o個班打成一片,似乎都盡左十二分努力,包括寫左個 Blog。佢個 Blog 寫o既野總係會令人諗起初出道時o既「亞久津老師」,有年青人o既幹勁,又有一 d 年青人o既情緒,不過感覺上都係個好老師,一定比o個個「葉旋中坑狂迷」好得多。

希望佢o個班會有開心難忘既兩年啦!

1 則留言:

匿名 說...

書面語才是王道!!