羅定短宣 遊戲環節時用的講稿

記得細個o個陣睇過一套卡通片，好似叫做....親子劇場o甘o既，套卡通片o既主角係一男一女同埋一個要上鍊o既機械人。每一集佢地都會揭一揭個一本叫做時光寶書o既書，裡面應該每一頁都係講一個聖經故事o既o既。佢地睇o個 d 故仔o既時候就會俾本書吸入去，去左個故仔裡面o個個時代入面，跟住就o甘開始每一集o既聖經故事。

如果我無記錯o既話，o個三個主角去得最多o既應該都係主耶穌o既時代，而且每次去到o個個年代o既話，佢地都會想去搵主耶穌，親自見佢一面o既。為左o甘，佢地就次次都要跑來跑去，好多時中途o個個要上鍊o既機械人就會無鍊，停左o係度唔郁，次次都要上番鍊先至得，好似 d 上鍊車仔一樣，好得意。

講到主耶穌，我其實都唔係記得好多野，剩係記得主耶穌好有愛心，好鍾意醫病，醫病o既方法.....我剩係記得一招，呢一招好印象深刻，就係佢多數都會叫病人望住佢對眼，病人跟住做o既時候，唔理佢患o既係咩野病，盲眼又好(?)，麻瘋病又好，雙腳唔行得又好，佢個病就會即刻好番晒架啦，真係好犀利。仲有，d 病人望住主耶穌對眼o個陣，個鏡頭就會近距離影住埋主耶穌塊面o個度，佢個眼神好有慈愛架，話唔定都係因為佢o個個o甘有慈愛o既眼神，d 病人先至會o甘容易好得番架呢。後來我第一次聽到「神愛世人、甚至將他的獨生子賜給他們、叫一切信他的、不至滅亡、反得永生。」呢句金句o既時候，第一時間就係諗起主耶穌呢個眼神。


以上是將會用在羅定短宣的遊戲環節的講稿，粗體的字為關鍵字，讀到關鍵字的時候，在場人士就要做出一些反應。因為是講稿的關係，所以用口語。不過有需要的話，就要改回書面語了。